Guski ngomnaajo jihawol Niger boymaajo Alhaji Abdullahi Kure uwaama handee alarba ha Mina laamorde jiha kan.

Kure maynaama on myande alat jeweetatabre lewru nduu nde o yaano tefuki nyawdiigu ton lesdi Jamani.

Imam jo juulirde mawnde nde Minna Sheikh Isa fari on ardi juuluki maynaado on.

Maynaado on mardo duubi 60 duudal jamaare haa yaake juuluki mo hadi o jippinee lesdi nder moota o juulaa.

Nder yaldiriibe janaaiza ngomnaajo on haa e ngomnaajo jihawol Niger jottaajo Abubakar Bello ardiido lesdi Naajeeriya boymaajo Janaral Abdussalam Abubakar, ngomnaajo jihawol Sokoto Aminu Tambuwal, Luuto mawdo Polis en Shuaibu Gambo, Laamiido Bida Yahaya Abubakar, Laamiido Lapai Umar Bako, Laamiido Minna Nuhu Bahago, e Laamiido Suleja, Alhaji Auwal Ibrahim.

Non ardiido majaliisaaru jihawol Niger wakili’en majaliisaaru jihakan, hawtaade e majaliisa dogginirgal laamu jiha kan Siyaasa’en e mawbe ngomnati jiha kan fuu hebi yaldirki.

Nder hobbe teddube yaldiriibe janaiza man haa e Ngomnaajo jihawol Niger boymaajo Babangida Aliyu, Sheikh Ahmed Lemu, Seneto Rabiu Kwankwaso, Sen David Mark, e ardiido majliisaaru ndottien boymaajo Sen Anyim Pius Anyim.

Nder jawaabuwol maako ngomnaajo jihawol Niger Bello andini dow himbe Niger har Abadaa yejjititaa Kure bee darnde maako her faanuki jiha kan yeeso e lesdi Naajeeriya fuu.

Owii koo ndeyee odo nder dabareeji no jiha Niger fa’irta yeeso.

O wii “bee feerootiral jamiya siyaasa ngal won hakkunde amin fuu woodi to nufooji amin yaadi her waduki jiha Niger nder bernde.”

“O Ndottijo, mardo gonga, dariido, neddo on boo timmududo mardo haaje wallutuki koo ndeyee ngam faanuki ummaatoore mum jiha Niger e lesdi Naajeeriya fuu yeeso.”

Min dalataa doanki mo haa abadaa bee wallinde nde o hokki her faanuuki jiha Niger yeeso.”

ngomna Kuure dali debbo gooto e bacci 6 jeweego’o.

Gurin

 

NO COMMENTS

LEAVE A REPLY